வரலாறு

குதிரை வீரர்களும், யானைப்படையினரும், அம்பு விடுவதில் சூரர்கள்  என திகழ்ந்தவர்களும், வேவு பார்ப்பவர்களும், வாள் வீச்சில் திறன் கொண்டவர்களும் மக்களோடு மக்களாக இருந்து எதிரி தேசத்திலிருந்து ஒரு துரும்பு கூட சோழ தேசத்திற்குள் நுழைய விடாமல் பாதுகாத்தனர்.  இத்தனை பாதுகாப்பு  இருந்தும் செய்வினை வைத்தும், பில்லி சூனியங்களை ஏவி விட்டும் சோழ தேசத்தின் வளத்தையும் பலத்தையும் குலைத்துப்போடுவதில்  சேர தேசமும், சிங்கள தேசமும் குறியாக இருந்தது. இவற்றை ஒற்றர்கள்  கொண்டு அறிந்து கொண்ட சோழ அரசு என்ன செய்யலாம் என யோசித்தது.

சோழ நாட்டின் தலைநகரான தஞ்சையில்  உள்ள பெருவுடையார் கோயிலிலும், சிதம்பரம் ஸ்ரீ நடராஜப்பெருமான் கோயிலிலும் விஷேச  யாகங்கள்  செய்யப்பட்டன. பூஜையின் நிறைவில், சிதம்பரம் என இன்றைக்கு அழைக்கப்படும் தில்லையம்பதி நகரத்தைச்சுற்றி நாலாதிசையிலும் மிகவும் சக்தி வாய்ந்த, பில்லி சூனியங்களையும் , காத்து கருப்புகளையும் அடித்து துரத்துகிற சக்திகளை,  தேவியருக்குள் இறக்கி, விக்கிரகங்கள் அமைத்துப் பிரதிஷ்டை செய்தால், தில்லையம்பதி வழியே எதிரி தேசத்தின் காற்றுகூட, சோழ தேசத்திற்குள் புகமுடியாது என சொல்லப்பட்டது.

அதன்படி தில்லையம்பதியின் நான்கு எல்லைகளிலும் நான்கு தேவியரின் விக்கிரகங்களும் பிரதிஷ்டை செய்யப்பட்டது. தேவியரின் திருமேனிகளை பூக்களால் அலங்கரித்து, ஊர்மக்கள் அனைவரும் ஒன்று கூடிப் பொங்கல் படையலிட்டனர்.

இந்த ஊருக்குள் இருந்தபடி காவல் காக்கிற வீரர்களுக்கு எந்தநோயும் வராம நீதாம்மா பாத்துக்கணும், அவங்களோட கண்களில் பார்வை கூர்மையைக் கொடுத்து, கைகளுக்கும், கால்களுக்கும் தெம்பை கொடுத்து, தோள்களுக்கு வலுவை தந்து, அவர்களுக்கு உடல் சோர்வு எதுவும் வராம, சாப்பிடுற உணவெல்லாம் சத்தானதா மாற, நீதாம்மா அருள்புரியனும் என வேண்டிக்கொண்டனர்.

தில்லையம்பதியின் வடக்குப்பகுதியில் ஸ்ரீ தில்லை அம்மனும், தெற்கு பகுதியில் ஸ்ரீ வெள்ளந்தாங்கி அம்மனும், மேற்கு பகுதியில் ஸ்ரீ எல்லை அம்மனும், கிழக்கு பகுதியில் ஸ்ரீ மாரியம்மனும்  இந்நகரை அருள்பாளிக்கின்றார்கள். அன்று துவங்கி தில்லையம்பதியின் நான்கு எல்லைகளிலும் குடியிருந்து இன்றளவும் சோழ தேசத்தை மட்டுமின்றி, மொத்த உலகையும் காத்தருளுகின்றனர் இந்த நான்கு சக்தி தேவியர்களும் .

இவர்களில் ஸ்ரீ மாரியம்மன் கிழக்கு திசையில் அமர்ந்து அருள்பாலிப்பதாலும், கீழத்தெருவில் கோயில் கொண்டிருப்பதாலும் இந்த தேவிக்கு அருள்மிகு கீழத்தெரு மாரியம்மன் எனப்பெயர் பெற்று விளங்கிவருகிறது. மேலும் இந்த அம்மன் சிறப்பு வாய்ந்த  சக்தியாக பிரார்த்தனை தலமாக கீழத்தெரு மாரியம்மன் திருக்கோவில் திகழ்கிறது.